Nasname Ozgur Bireyler Toplulugu: Piştgiriya ku li Serok Talebanî tê kirin firehtir dibe 

Piştgiriya ku li Serok Talebanî tê kirin firehtir dibe
================================================================================
Nasname - : on 12 Mar, 2010 09:10:00
 
Cîgirê serkomarê Îraqê Tariq Haşimî jî di beyanameyeke nû de ragihand
ku ew rêz li wê çendê digire ku Mam Celal wek serkomariya Îraqê bê
hilbijartin û bêyî cidahî posta serkomariyê mafê hemî welatiyên Îraqê
ye.
Endamê parlamentoya Îraqê yê ser bi Eniya Tewafiqê Reşîd Ezawî jî di
daxuyaniyekê de got: "Herçende hê encamên dawîn yên hilbijartinê nehatine
ragihandin Em wek erebên sinne, bi me baş e prosesa siyasî û destûra
Îraqê û tewafuqa navbeyna hêzên siyasî dom bike. Em hêvîdar in Serok
Talebanî dîsa bibe serkomarê Îraqê."
Çend roj berê Tarik Haşimî di daxuyaniyekê de gotibû: "Îraq welatekî
ereb e loma divê serkomarê bibe kesekî ereb".  Herwiha piştî Haşimî jî
siyasetmedarê şovenîst Usame Nucefî ku erebekî sinne ye, di daxuyaniyeke
xwe de got: "Em qebûl nakin Celal Talebanî dîsa bibe serkomar, divê
serkomarê Îraqê bibe erebekî sinne".
Piştî çend daxuyaniyê bi vî rengî jî serokatiya herêma Kurdistanê
duhî beyanameyek derxist, tê de rexne li nêrînên şovenîst ên hin
şaxsiyetên li Îraqê girt û got : "Namzetê me yê ji bo posta serkomariya
Îraqê cenabê Celal Talebanî ye.  Di maddeya 14yê destûra Îraqê de bi
aşkereyî tê gotin, bêyî cidahiya regezî, etnîkî û neteweyî hemî
welatiyên Îraqê yeksan in, wek di maddeya 168ê de tê gotin, bêyî
liberçavgirina nasnameya wî/wê ya etnîk, neteweyî û nasnameyên din, kesê
ku bav û diya wî/wê Îraqî ye dikare xwe ji bo serkomariya Îraqê bike
namzed."
Serokwezîrê Kurdistanê Berhem Salih jî di daxuyaniyeke xwe ya vê dawiyê
de li ser vê mijarê got: "Bi ya min tenê kurd nabêjin bila Serok Talebanî
dîsa bibe serkomarê Îraqê, çimkî gelek hêzên li Îraqê jî dixwazin ew
dîsa bibe serkomarê Îraqê. Heta niha ji bo posta serkomariyê kes
derneketiye ku pêşbaziyê bi serok Talebanî re bike."
Endamê serkirdayetiya YNKê Sadî Ahmed Pîre jî da zanîn ku hemî
serkirdeyên Îraqê piştgirî li Serok Talebanî dikin ku dîsa bibe
serkomarê Îraqê.
11ê adarê 2010, PUK Media
Nasname