Nasname Ozgur Bireyler Toplulugu: Kes nikare Kurdên Bakur bike qurban!

Kes nikare Kurdên Bakur bike qurban!
================================================================================
Êlxan  Penaber on 05 Apr, 2009 05:22:00
 
Dagirkerên me rojeva me didin ber me, dibêjin "ha ji we re, hela hûn çi
difikirin, gelo em berê li we bixin û paşê we bixwun an we berê bixwun û
paşê li we bixin? De ka raman û biryarê bêjin." Berê ajansên Kurdî viya
diweşînin. Bi lezî rojname, kovar û medyayên Kurdî van nûçeyan
dixemilînin. Ev e çapemenî û medyaya Bakur.
Dor tê dora "ronakbîrên malnişîn nabin". Evana ji ezelê heya ebedê zana
û ronakbîr in. Her tiştî dizanin. Civaknas in, derûnînas in. Helbestvan,
rojnamevan, nivîskar, dîroknas, endezyar, kardiyolog, kozmonot heya bigire
olnas in. Tişta nezanibin nîne. Her yek ji wan pişta xwe dane ber û
partiyekê. Ev e rewşenbîriya Bakur.
Partiyên Kurdan ne biserdikevin, ne têk diçin, ne xizmetekê dikin, ne
dihêlin xizmet bê kirin. Wekî qeraseyên berateyan xwe çepilxwarkî avêtine
ser gelê Kurd. Xelk di bin wan de bêzar, bêbêhn û bêhevî bûne. Ev e
partîgeriya Bakur.
Sal diborin, dehan sal, çilan dal derbas dibin, ronakbîr ronakbîr, partî
partî, serok serok dimîne. Kurd dîsa bindest, Kurdistan dîsa malê talanê
ye. Neteweya Kurd roj ji rojê bêhtir qels, xizan, bêperwerde dibe. Kurdî
dibe zimaneke windabûyî. Kurdistan vala dibe. Sirûşta Kurdistanê tê
tunekirin. Ev e rewşa Bakur.
çi bû, bû, ji nişka ve Amerîka û Tirkiye li me hatin rehmê.
Ergenekoniyên ku amadekariya genosîda Kurdan dikir dan sekinandin. Herçendî
dosyaya Kurdistanê venekirin û vepixandin jî û herçendî wekî nimûneyan
be jî, endamên vê rêxistina dizî ya Dewleta Romê hatin girtin.
Ji nişka ve TRT 6 vekirin. Behsa perwerdeya Kurdî li zanîngehan tê kirin.
Şivan Perwer ket hewla vegera Tirkiyeyê. Hilbijartinên şaredariyan hate
kirin û destên DTPê dîsa hat xurtkirin.
Niha jî behsa "Konferansa Kurd" tê kirin. Rojname, nivîskar û kes-kûsekê
nîne ku behsa vê konferansê bike. Hûn ê bêjin azadiya Kurdistanê nêzîk
e. Hûn ê bêjin Roma Reş bûye Roma Spî. Hûn ê bêjin Amerîka bûye
milyaket. Hûn ê bêjin Başûrê Kurdistanê her tiştê xwe safî kiriye,
Kerkûk kiriye nava axa bav-kalan, xelkê xwe têr û bextewar kiriye, niha jî
dixwaze Bakur azad bike.
Gelo wisa ye?
Helbet na. Li Bakur tevgerên Kurdan têk çûn. 30 sal in Kurdan hebûna xwe
dan PKKê. PKK ket destê öcalan û ew jî kete destê Roma Reş. Destê
Dewleta Tirk di nava çepgir, îslamperwer û rastgiran de bû. Carnan destê
xwe dixist nava tevgerên Kurdan jî lê destê wê dihate birrîn. Lê, bi
dîlgirtina öcalan bextê wê bilind bû.
Niha ew in li meydanê. Amerîka ye, Tirkiye ye, cîhana Ereban û îran e. Ji
xwe re gorî dilên xwe dîzayneke nû çêdikin. ên din hemî berdest in,
bêî vîn in. Hêzên Başûr jî bila pozbilindiyê nekin lewra ew jî berdest
in.
Gelo ma xirab e ku konferanseka Kurdan çê be?
Na. Hemir me Kurdan nekaribû bi hêz û keda xwe konferanseke neteweyî
lidarbixin, misteheq e ku xelk werin ji me re bikin. Bila ti partiyekê Kurd
nebêjin "em na lê yên din berpirsiyar in". Na. Ji PDK-îraqê heya PSKê
hemî jî sûcdar in. Ji bo partiyên xwe her tişt kirin lê hewla xebatên
neteweyî yên "ser partiyan re ne" nekirin.
Carnan PKKê xebatên yekîtiyê xirab dikir, carnan jî partiyên Başûr.
Dikarim qet nebe mînakên ez pêdizanim bêjim lê bi we jî eyan e. Partiyên
me di pêşbaziyê de têk çûn.
Başûriyan diviya bû roja ku Amerîka kete îraqê dest bidana ser axa bav û
kalan, Kerkûkê. Amerîkayê karê xwe bi wan da meşandin, xilas kir û got
"hûn kê ne!?". Amerîka dîsa vegeriya ser hevbendiya klasîk bi Tirkiye û
Ereban re.
Niha Amerîka dîzaynê dide Kurdan. Bila bide. Dibêjin "çareserkirina herî
xirab ji bêçarebûnê baştir e". PKKê Bakur û Kurd herimand. 30 sal in
serekê xapanok dimeşîne û mala me mîrat kiriye. Alternatîvekê nû heye
lê hêj gelek qels û lawaz e. Newêre derkeve meydanê lewra naxwaze xetayên
bav-kalan dubare bike. Dem pêwîst e.
Hemir ev şerê li Bakur xapanok e, hemir şer ziyanê dide me, baş e ku
çê-xirab aşitî û aramiyekê were. Hema kê dike bila bike, ji me re aşitî
lazim e. Bila bihêlin Kurd birînên xwe sax bikin. Bila aboriya xwe baş
bikin. Bila ji şehîdên xwe re goran çêbikin, windabûyiyên xwe bibînin.
Konferans wiha dibin?
Gorî ajansekê, serok Barzanî gotiye "xebera min ji konferansê nîne, min
jî di çapemeniyê de xwendiye". Dibe ku ev nûçe ne rast be, nizanim. Lê
tişta ku min fêhm nekiriye, serencama amadekariya vê konferansê ye.
Xebera kesê jê nîne. Ti amadekariya kesê nîne. Kê vexwendine ne kivşe
ye. Dem, cih, lijne, naverok, aktor hwd ti tiştekê kivşe nîne. Ya rastî
kesê konferanseke bi vî rengî nedîtiye. Qaşo konferanseke Kurdan a bi
giştî ye.
Konferanseke neteweyî wisa nabe. Konferans bi dizî û îllegalî nabin.
Herkes nûnerê xwe dişîne wir û diaxive. Di dawiyê de li yekkirinekê
digerin û wekî daxwaza hevpar a tevkaran daxûyaniyeke fermî tê îlankirin.
Lê îcar ne wisa ye. Bi hesaban dê ev konferans di vê mehê de were
lidarxistin lê hêj haja kesê jê nîne.
îhtîmal in ku:
- Dereweke vik û vala be û bi biharê re dixwazin PKKê bilî û gêj bikin
- Amerîka, Tirkiye, îran û îraqê lihevkiribin ku dîzaynekê bidin Başûr
û Bakur
- Planeke împeryal a Tirkan be û dixwazin çarenûs û paşeroja Kurdan bixin
bin siya Romê
- Plana bêçekkirin û jiholêrakirina PKKê be û dixwazin viya bi alîkariya
Kurdan pêk bînin
- Lihevhatinek be ku federasyoneke sist bo Başûr û mafên kûltûrî bo
Bakur bike armanc û bixe bin siya Tirkan
- Ew ê rojekê bikin lê bi viya dixwazin reaksiyonên neteweyî yên Kurdan
bipîvin
Bila neyên jibîrkirin
- Bakur ji hemî parçeyên din mezintir e
- Ne qedera Bakur lê ya Başûr bi Bakur ve girêdayî ye
- Raûnda herî dawî û bingehîn a têkoşîna azadiya Kurdistanê li Bakur
tê dayîn
- Tirkiye ne îran û îraq e, Amerîka, Ewropa û NATO ye. Ji ber wê ye ku
karê Bakur ji yê hemî parçeyên din dijwartir e
- Bakur herçendî 30-40 sal in PKKê tehrîbatî kiribe jî, piştgiriya
Başûr dike bi destketiyên wê serbilind dibe. Dengê Barzaniyê Nemir her
diçe li Bakur bilindtir dibe.
- Bakur ji aliyê jiyana civakî û nûjeniyê ve ji Başûr pêşketîtir e.
Herwiha azadiya jinan jî ji ya Kurdistana Azad zêdetir e
- Potensiyelên Bakur bi her awayî ji yên Başûr zêdetir in
Bila wekî serhildanên berê, neyên xapandin
Heger ez ji serî heya binî şaş im, bila amadekarên vê konferansê
sererast bikin. Bila rayedarên Bakur di paş perdeyan de bi dijminên me re dek
û dolavan negerînin.
Ji dîrokê divê ders werin derxistin. çawa Seyîd Riza bo hevdîtinan
vexwendibûn û dîl girtibûn. çawa soz dan Şêx Seîd ku hêj goristana wî
jî nîne. çawa bi navê biratiya îslamê em kirin sêwiyê ummetê. çawa em
bi biratiya Kurd û Tirk vekişandin meclîsa Romê û yeko yeko xeniqandin.
çawa bi destê kurmê darê, Elîşêr Beg û Zerîfe Xanim kujtin. çawa
Bozan Beg bi destên Mihemedê Kurdelîfê (Qereyilan) dan kujtin û paşê ew
jî kujtin birin avêtin camiya Dîlokê. Bila bi soz û peymanên dijminan
nexapin û bi hişyarî tevbigerin.
Bila Başûrî nekevin paş perdeyên Bazirganên Helebê
Em 20 milyonên Bakurê, ji dil piştgiriya Başûr dikin. îro dibe ku ji ber
xizanî û perîşaniya têkçûnê, nekarin aîkariyeke fîîlî bikin lê dê
rojekê bibe. Em miletek in û bixwazin-nexwazin çarenûsa me bi hev ve
girêdayî ye.
Bila hin siyasetmedar wekî ticarên Helebê nekevin nava giltên mîhan, bi
şerefa gerîllayên Kurd nelîzin. Li ser teslîmkirina gerîllayan nekevin
bazarên firotinê.
Apo tiştek e, gerîlla tişteke e, herdu ne yek in. Gerîlla ji bo azadiya
Kurdistanê derketiye lûtkeyên çiyan. Xûşk-birayên me, zarokên me ne.
Mafê kesê nîne bêje "werin teslîmê dijmin bibin". Rast e, öcalan bi
hêviyên wan lîst û doza wan pûç derxist, lê em Kurdên Bakur jî hêj
negihîştine azadiyê.
Werin çi bikin? Dikeve serê we? We rejîma Saddam têkbir, pêşmergeyên we
vegeriyan malên xwe û neviyên xwe mezin kirin? Niha çi dikin? Filîstînî
û îsraîliyan bi hev kirin, gerîllayên El Fetîhê vegeriyan malên xwe û
pez-dewar xwedî kirin?
Na. Gerillayên El Fetîhê bûn hêzên ewlekariya Filîstînê. Bûn polîs,
leşker, mîlîs û gelê xwe parastin. Pêşmergeyên we herwiha bûn hêzên
parastina herêmê. çima hûn viya ji bo me layîq nabînin? çima hûn me
teslîmê dest û lepên Roma Reş dikin? çi heqqê we heye?
Eyb e ku hin rayedarên Başûrî bibêjin "dewleteka Kurd xeyal e". Xelkê
bêje xeyal e yan ji ber kirinên we bûye xeyal? We heya niha bo avakirina
dewleteka Kurd a serbixwe çi xebat kiriye? We ji bo yekîtiya Kurdan çi
kiriye? Em we rexne nakin. Me bo demekê dev û çavên xwe girtine, heya hûn
derkevin rojên fireh naaxivin.
Lê jibîr nekin ku Kurdistan ji we mezintir e. Bakurê Kurdistanê dikare
serî bi NATOyan re bikişîne. Hûn Bakur nasnakin, bi problemên Bakur
nizanin. Hûn Bakur wekî xemleke bênirx a têkoşîna neteweyî dibînin. Ne
rast e.
Bila PKK şer rawestîne lê Rom jî gavan bavêje
PKK hatiye wê radeyê ku êdî tiştekê naxwaze. Bi giranî ketiye bin
kontrola öcalan û Dewleta Romê. Şerekê provokatîv û xapanokî
dimeşînin. Ziyanê didin me. Lê ev ne sûcê gerîllayan e.
PKK bila ji Başûr derbikeve. Lewra li wir tiştekê nakin, tenê dibin sedem
ku îran û Tirkiye Başûrê Kurdistanê bêîstîkrar bikin. PKK tenê mafên
kûltûrî dixwaze û ji bo wê jî şerê çekdarî hewce nake.
Em ji dîroka Kurdistanê dizanin, roja ku Kurd qels ketin, dijmin êrîş
tîne û komkujiyan dike. çi sedem û nîşane heye ku îcar neke? Gelo dê
Amerîka û Ewropa were me biparêze? Amerîka û Ewropa nebû Kurdistan parçe
parçeyî kirin û avêtin devê barbaran?
Herî kêm divê evana bibin
- Kurd û mafên Kurdan bikevin destûra bingehîn a Tirkiyeyê
- Bi şerefa gerîllayan neyê lîstin
- Hemî girtiyên polîtîk ên Kurdan werin serbestberdan
- Navên erdnîgarî yên Kurdan şûn ve werin vegerandin
- Dewlet dest ji polîtîkayên pişavtinê bikişîne
- Sîstema cerdevaniyê were betalkirin û cerdevanên sûcê şer kirine bên
darizandin
- Kurdî bibe zimanê fermî û perwerde li Kurdistanê qet nebe ji du paran
yek bi zimanê zikmakî be
- Kurd bi xwe bikaribin xwe biparêzin, hêzên polîs bi giranî ji Kurdan bin
(li Kurdistanê)
- Cihê Kurdên windabûyî werin gotin û bi merasîmên fermî werin
definkirin
- Ji PKKê û Dewleta Tirk, komên şer ên îllegal werin betalkirin
- Ziyanên gundiyên gundên wan hatibûn rûxandin bên dayîn û riya vegera
wan were vekirin
- Astengî û qedexeyên pêşiya xebatên siyasî, çandî û hunerî yên
Kurdan werin rakirin
- Polîtîkayên şêlandina Kurdan ên ji damezrandina komarê heya îro hene
werin rakirin, riya pêşketina aboriyê were vekirin.
Navê konferansê eşkere bikin
Konferansa Kurd e yan "Konferansa bêçekkirin an jiholêrakirina PKKê ye"? Bi
rastî çi ye? Konferans e yan civîneke ji bo rewakirina biryarên
Amerîka-Tirkiye-îran û îraqê bo Kurdan e? Konferansa firotina Bakur e, yan
edilandina Bakur e? Konferans e yan dafikek e? Konferans e yan civîneke
îllegal e? Konferanseke bixêr e yan bêxêr?
Nasname jî dê deklerasyonekê ava bike. Em wekî platformeke azad piştgiriya
ramana azad dikin. Derbareyê konferansa Kurd de jî herwiha deriyê xwe ji
hemî pênûsan re vedikin. Em şer û şîddetê naxwazin. Lê em bindestî,
xapandin, birakujî û koletiyê jî naxwazin.
Em naxwazin parçeyên Kurdistanê ji bo berjewendiyên xwe hevûdu bifiroşin.
Ji me re di hevbendiyên herî hindik de yekdengî, di xebatên neteweyî de
yekîtî divê. Fermo hûn jî gotinên xwe bibêjin.
elxan.penaber@googlemail.com
5'ê avrêlê 2009
êlxan Penaber